البيانات البنجمعها

لما تسجّل كمتبرع:

  • اسمك، ورقم هاتفك.
  • فصيلة دمك، والجنس (عشان نحسب الفترة بين التبرعات)، وسنة ميلادك (عشان نتأكد إنك في عمر التبرع).
  • الولاية والمحلية والحي الساكن فيه.
  • تاريخ آخر تبرع لو كتبتو، والوقت المناسب للتواصل معاك.

ولما تكتب تعليق على مقال: الاسم البتكتبو، ونص التعليق، وعنوان الـIP بتاع جهازك، والأخير ده بنستخدمو بس عشان نوقف السبام.

بنستخدمها لشنو

  • نرسل ليك رسالة نصية لما مستشفى قريب منك يطلب فصيلتك. الرسالة فيها اسم المستشفى ورقم المرافق.
  • نذكّرك كل كم شهر تتأكد إنو مكانك لسة صحيح، ومعاها رابط تحدّث منو بياناتك.
  • تقارير بالأرقام بس، زي عدد المتبرعين في كل محلية، عشان نعرف المناطق المحتاجة متبرعين. التقارير دي ما فيها أسماء ولا أرقام هواتف.

ما بنرسل ليك أكتر من طلب واحد في الأسبوع، وما بنرسل ليك لو اتبرعت قريب.

منو البيشوفها

  • فريق إدارة الموقع بس بيشوف بيانات المتبرعين، عشان يدخل الطلبات ويتابع الإرسال.
  • رقمك ما بيظهر للمستشفى ولا للمرافق. إنت البتستلم رقم المرافق، وإنت البتقرر تتصل بيهو ولا لا.
  • شركة الرسائل النصية بتستلم رقمك ونص الرسالة بس، عشان توصّل الرسالة ليك.

ما بنبيع بياناتك، وما بنديها لأي جهة تانية لأي غرض تاني.

تعديل بياناتك أو مسحها

  • تعديل المكان أو تاريخ آخر تبرع، أو وقف الرسائل: من الرابط الخاص البيجيك في رسالة التذكير. وممكن تطلبو مننا في أي وقت.
  • مسح بياناتك نهائياً: تواصل معانا، وبنمسحها.

الحماية

الموقع شغال بـ HTTPS، فالبيانات بتمشي مشفّرة بين جهازك والسيرفر. الدخول للوحة الإدارة بكلمة سر، وكل زول عندو صلاحيات على قدر شغلو. وبنعمل نسخة احتياطية يومية عشان البيانات ما تضيع.

الكوكيز

بنستخدم الكوكيز الضرورية لتشغيل الموقع بس، زي حماية الفورمات من الطلبات المزيفة. ما في كوكيز إعلانات ولا تتبع.

فيديو المبادرة في الصفحة الرئيسية من يوتيوب (بالوضع الخاص بتاع يوتيوب). ما بيتحمّل منو أي حاجة إلا لما إنت تضغط تشغيل.

تواصل معانا